حدث في جمهورية تيكا تيكا الديكوقراطية…4

وصلي ايميلز كتيرة الفترة الي فاتت بتطلب مني حاجة لذيذة قوي أجمل التعليقات الي وصلتلي تعليق بيقول من شلة سنو وايت كلية العلوم جامعة القاهرة قسم المايكرو الي رئيس جمهورية  بتنجانوليا ورئيس قسم المحمودية لجمهورية تيكا تيكا الدكر بطية  نفسنا ياعمنا تكتب لنا ( واخدلي بالك من القافية ) حاجه عن الامتحانات الهباب دي وطبعا مش هحكيلك علي دكاترة علوم ما انت عارفهم ورينا امتحانات تيكا تيكا وبالأصالة عن نفسي وأخواتي المسجونات في البيوت من غير تفاريح وهاتك ياصويت وياعياط بسبب الامتحانات بنحييك علي تيكا تيكا ومستنينك في الامتحاناتيكا

زي ما انتم شايفين فضلت أضحك لحد ما وقعت من علي الكرسي من كتر الضحك ووفقا لرغبة الجماهير وبالأخص شلة سنو وايت جامعة القاهرة  عملت الحلقة الرابعة...بس امتحان ثانوية عامة ..علوم دي عايزة خمس شهور عشان اعرف اعمل امتحان يناسبها ومتقلقوش هتلاقوا متحان ليها في كتابي ان شاء الله

<!--[if gte vml 1]> <![endif]--><!--[if !vml]--><!--[endif]-->

امتحان مادة اللغة العربية لطلاب الثانوية العامة لجمهورية تيكا تيكا الديكوقراطية للعام الدراسي 2008

هذا الامتحان برعاية اندومي - الشعرية الأكثر رواجا  في الامتحانات

اجب عن الأسئلة التعجيزية التالية

هذه الأسئلة لا علاقة لها بمسابقة - مـن سيـربـح المـلـيـون ولا 0900ولا اشحن من فوفة فون ولا انديانا جونز  ولا سبيس تون)

السؤال الاول

التعبيــــــــــــــــــــــــــــــــــــــــــــ ــــــــــــــــــــــــــــــــــــــــــر

اكتب ما لا يقل عن650 سطر

في احد الموضوعات الاتية
ــــــــــــــــــــــــــــــــــــــــــــــــ


لم يجد الطفل غير الشارع ملجا نظرا لحالة البلد الهباب فاتجة الي السرقة

وتجارة المخدرات والصياعة مع البنات وقبض علية متلبسا بقطعة حشيش( سيبك من البنات )و اكتب القصة مع تسليم قطعة الحشيش للمراقب


بعد انتشار ظاهرة اكل لحم الكلاب والحمير وزيادة أسعار الحمير عن البني آدمين من وجهة نظرك تكلم عن الظاهرة ومن المتسبب فيها من غير غلط (الورق متراقب)

السؤال الثاني

القصة
ـــــــــــــــ

من قصة (وعهد الله لحمة الحمير زي الفل و مالة الفول ياابو حنان )
ــــــــــــــــــــــــــــــــــــــــــــــــــ ـــــــــــــــــــــــــــــ

بعد تصريحات بيطراوية مصهللة
من الناحية الشرعية أكل لحم الحمير لا يجوز ، أما من الجانب العلمي فإن لحم الحمير يهضم بطريقة عادية جدا ،

ثم اتي مستر كفته ألسطة كبير جزارين المدبح وضرب أحد التيكا تيكاوية المعترضين بالحذاء وقال: حمير تيكا تيكا بتاكل أحلي أكل لعلمك مش كفاية بتاكلوا لحمة ومستورين عايزين اية تاني؟؟؟؟ انتم عايزين معجزة عشان تاكلو لحمة طبيعية .. مش كفاية العيش المدعم..

من وحي القصة أجب الآتي من غير طفاسة:

ما هي اللحمة ؟ او علي الاقل حدد اقرب معني خيالي لها ؟

أذكر ثمن تذكرة المتحف التيكاتيكاوي للحمة...؟

السؤال الثالث:

اختر الإجابة الصحيحة:

ما الذي يحدث لوالدك عند ذكر كلمة لحمة ثلاث مرات في وجهه  ( يخبط الي قدامه بالفاظة— يطلق والدتك – يتبري منكم – بيسيبلكم البيت ويطفش )

جاوب ومش هنقول لوالدك ...

مرادف معجزة في اللغة (تغيير وزاري - زيادة مرتبات – عيش فينو من الكبير أبو سمسم  - )الي هيمد ايده هقطعهالوا


رغيف العيش الطبيعي هو الي ( من غير مسامير –  من غير خشب – من غير دقيق وردة – يعني ايه عيش طبيعي ..)

حلل بمزيد من التفصيل(احسن لك) جملة ضربة بالحذاء ومدي توافقها مع جملة تيكا تيكا بتتقدم بينا ويبقي أنت أكيد أكيد في تيكا تيكا ...

المشروب الرسمي لهذا الامتحان هو زيــــت الــســمــســم ويصرف لكل طالب واحد كادليز من الحجم العائلي ..فاصل ونعووود

مرحبا بكم من جديد مع السؤال الرابع

من نص( البط البط الوز الوز  للشاعر الكبير سعد الصغير)

اقرأ ثم أجب
ــــــــــــــــــ


البنات بقو زي الرز كله بيرقص ويهز ..

ولا اللينسز والمني جيب خلي وشي يجيب ألوان..

الجيبه مش مفتوحة وبس فوق الركبة بشبر ونص ..

الباديهات مع انها قطن بس مبينه نص البطن ..

قشطه قشطه 
اكمل الاغنية( ولو صوتك وحش هتاخد علي قفاك )


تعليمات الاسئلة ( ممنوع لمس ورقة الأسئلة وانت بتجاوب ..

الي هيتمسك بيبصبص للورقة هتتدبسله في التيشيرت )

اختر من بين الأقواس
ـــــــــ
<!--[if !supportLineBreakNewLine]-->
<!--[endif]-->

ما المقصود بالنيل (المسيسبي-الامازون- يونج يانج - مبتكلمش في السياسة )

ما المقصود بالقطن (أي حاجة ببادج صنع في تيكا تيكا من الهلال والنور – معرفش غير دودة القطن – مبتكلمش في السياسة برضو )

آخر مرة شفت فيها مني جيب كان ( من نص ساعة – من ساعة )

طريقة لبس المني جيب من غير أهلك ما يعرفو ( بتاخديها في شنطه وتلبسيها عند صاحبتك – بتتلبس تحت الملابس الرسمية- بلاش احراج)

أكتر مرة بتقول فيها قشطة ( لما بتشوف مزة جامدة – لما بتقول قشطة يامان – لما بتروح تشتريها – والنعمة عمري ما اشتريتها )

استخرج من البيت الثالث صورتين يكونوا حشمة ..

رابعا القراءة ( ايوة تاني قراءة لو مش عاجبك ..امتحن وبعدين اشتكي ..اشمعني الامتحان يعني هتشتكي الأول )



من درس( حين مسخرة) ( الي هيتمسك بيسبل لورقة الأسئلة هيطلع بره  والي مدخلش الفيلم هو بس الي يجاوب )
ــــــــــــــــــــــــــــــــــــــــــــــــــ ـــــــــــــــــــــــــــ

اذكر اسم مصيبة واحدة ما حصلتش في النص ؟

سبب وجود الشرطة كل خمس دقائق في الفيلم عكس ما عودونا انها تيجي آخر الفيلم بعد ما البطل يشيل البطلة ويتكل علي الله ؟

( من درس بنات وبزازات )

اذكر عدد المايوهات في الفيلم مع توضيح نوعها وألونها والمحل الي اشتروها منه ..؟

عدد المشاهد التي منعتها الرقابة مع وصف مشهد منهم بالرسم وياريت لو ألوان ؟

سبب منع الأفيش مع إعطاء سي دي الفيلم للمراقب  ؟

فاصل إعلاني: اشتري عبوة سيريلاك و اربح علبتين بامبارز مجانا ،العرض ساري حتى نهاية الامتحان...

حد عايز عرقسوووووووووووووووووووووووس , حاجة ساقعة بيبببببببببببببببببببببس

سندوتشااااااااااااااااااااااااااااااااات .......طب كورن فليكس

عدنااااااااا

مرحبا بكم من جدد مع السؤال الخامس(النحووووووووووووووووووووو)

اعرب ما تحتة خط ولو ما لقيتش القطعة اعرب الخط

______________________________________


ذهب رئيس تيكا تيكا الي المؤتمر ...اجعل الجملة مثني) ما عد ا الريس طبعا يابقف منك له )

فرضت الضرائب علينا ببشاعة والضرايب مصلحتك أولا وهنفوترك

 اعرب الجملة وارفع الضرائب وحياااااااااااااااة ابووووووووووووووووووك ياشيخ

اعرب هنفوترك مع دفع كل فواتير المراقب والناظر

 وإعطائه مصروف ايده واتنين كيلو عنب بناتي وممنوع بوس  العنب في الامتحان .. متنساش تاخد فتورة من المراقب بعد تسليم ورقة الاجابة

تحت ضوء جنان البورصة وارتفاع الأسعار الجنوني  لما تم نقل السوق المالي إلى سوق السمك ؟

هذا السؤال برعاية توناكولا المشروب الرسمي لمدرسة لم ينجح أحد الثانوية
السؤال السادس


الخط
ـــــــ

كوز المحبة اتخرم طرطش علي كمي يا حبيبي بطل جفا وارحم أمي

اكتب الجملةالسابقة بثلاث خطوط

فوفة فون (انا فوفة فون..)

موبيفيل(أدينا بنحشش ورانا ايه ورانا ايه  )

اتصالات (الراعي الرسمي للمنتخب (

كما يمكن ان تحول من خط لخط بنفس القلم

فقط اتصل بالمكتبة

السؤال السابع

أ-

باخرة تطير بدون محرك بسرعة 2عقدة في الكيلو فوق البحر الأصفر المتوسط بجوار جزر طنط أم كيكي (قبل أذان المغرب بخمس دقايق كده) فاذا علمت ان الباخرة محملة قصب وعمق الترعة  نص ركبة وكثافة الماء 1000كجم/ساعة

(عارف انه امتحان عربي بس السؤال ده بلطجة )

أوجد الآتي ولخص

اسم والدة الطيار وحماته واسم المزة الي ساكنة قدامهم ؟

رقم بطاقة زوج أخته البكر؟

عدد الركاب المزوغين من الطيار؟

سبب اختفاء الباخرة؟

اسم وزير النقل بجزر طنط أم كيكي ؟

رقم تليفون كيكي؟

ب-

علل لما يأتي

استخدام الأديب العالمي هلهوطة   لمبة الجاز في كتابة روايته الأخيرة ( حب في الخرابة )... ولماذا لم تعترض الرقابة علي الخرابة ..

مع أطيب التمنيات ..باقي الأسئلة في الدور الثاني ...

مرفق مع ورقة الأسئلة  تومارجي مستشفي المجانين وزجاجة سم فران ....يرجي عدم الانتحار بالسم كله عشان باقي زمايلك..

اسلام بيه فتحي